浪子？（續）

上篇講到Ａ君盡力保留年輕形象，抗拒成熟，好快問題嚟啦。

Ａ君查實前幾年識咗一位女朋友Ｂ君。最近Ｂ君搵番Ａ君，Ａ君一直以為同佢嘅感情已經無疾而終，因為Ｂ君過去工作實在太忙，同Ａ君好難擦出火花；一碟餸煮起太耐，攤凍晒都唔好食啦。近幾年大家都好少見面，只係偶然響電話傾幾句閒偈，喺Ａ君角度，Ｂ君而家只係一個普通到唔普通，甚至有啲生疏嘅朋友，但雙方都冇認真去檢視，究竟大家隔咗咁耐，仲算唔算拍緊拖。Ａ君睇佢個死樣就一定話唔係啦。

一啲中間人最近同Ａ君講，Ａ、Ｂ君一日未當面講分手，千祈咪算數，當以前嘅事係粉筆字咁抹咗佢？好難！頂多話佢哋嘅感情只係雪藏咗，未玩完o架。Ａ君覺得慚愧，又半信半疑，好似董特首嗰套理論咁，一件事冇提好耐，其實早已不存在？據探子回報，Ａ君呢幾年唔去諗呢個問題，Ｂ君一樣冇，大家都唔當係一回事，咁雙方都冇hard feeling，雪藏咗都可以解番凍啦！

Ａ君跟住又開始苦惱一個問題：佢好相信緣份，「有緣千里能相會」，命中註定有一個愛人要一生一世相伴嘅話，匿到天腳底都走唔甩。起初Ａ君都幾以為Ｂ君係一個「失而復得」嘅人，即係有緣啦，假如信命水嘅，應該盡快重修舊好。不過，當Ａ君開始諗，第日約Ｂ君出嚟見面，有乜嘢話題？愛係要彼此尊重、互信、分享快樂、分擔憂愁，但係Ａ同Ｂ嘅生活圈子冇乜地方重疊，好難搵到共同有興趣嘅話題。工作苦樂？生活體驗？時事八卦？Ａ君怕悶親Ｂ君，唔想多講自己嘅事，但係要投其所好一樣難，因為搔爆頭都唔知Ｂ君對乜嘢有興趣，即使有，自己又唔太熟悉，講幾句乾晒塘，又dead air就醜怪。淨係諗見面有乜好傾，都足以搔甩Ａ君多幾十條頭髮。

我可以話Ａ君自大－－我所思所想太高深，點講佢都唔明，所以唔多講。

又可以話Ａ君自卑－－我日常生活興趣好silly，驚俾佢知會笑我，更驚佢睇我唔起，所以唔多講。

客觀咁睇，Ａ君未至於完全唔鍾意Ｂ君，至少Ｂ君背景簡單，為人斯文，有份穩定嘅工，談吐算OK，基本條件唔差，唯一問題係Ａ同Ｂ君大家平日工餘時間各自搞小圈子，心靈交流認真少，少到完全唔似係一對。

對Ａ君另一個更大問題：Ａ君願唔願意告別大世界，投入小世界？大世界者，朋友也；小世界者，情人也。Ａ君獨身，身邊多數係豬朋狗友，得閒就行街好，影相好，煲電話粥又好，上網吹水唔抹咀，玩大家都有興趣嘅嘢。Ａ君又相信Ｂ君唔會有太多共同興趣，假如要拍拖，投入小世界，咁就要改變自己好多嘢，平日玩開嘅嗜好要放棄唔少，可能要時時刻刻跟住Ｂ君走，告別自己個生活圈子，投入對方嘅圈子，連佢最熱衷嘅「形象年輕化」都隨時要停止－－畢竟Ｂ君年紀細唔過Ａ君好多，Ａ君鍾意扮o靚仔啫，Ｂ君唔鍾意做o靚妹喎，假如Ａ君繼續形象「降級」，同Ｂ君一齊，好以兩姊弟咁款，幾怪相?!

Ａ君應該要開始做一個抉擇：
1. 浪子回頭，全情投入同Ｂ君戀愛，淡出朋友堆，回復真實年紀嘅形象。
2. 依然故我，繼續做王老五（雖則冇乜機會鑲鑽石），假如而家班朋友又拍拖結婚，就再相識另一班更年青嘅朋友。

當然，不排除第三、第四以至更多條路：
3. 可能Ｂ君會認同Ａ君嘅愛好，仲會支持佢，咁Ａ君可以拍拖，又可以保存自己嘅形象（最理想）
4. 認為Ｂ君唔太適合自己，於是去物色另一位會認同自己嘅Ｃ君（呢樣嘢，Ａ君近幾年都嘗試過，始終失敗）
5. ... （大家可以補充）

緣就有啦，份呢？Ａ君想同Ｂ君重燃愛火，都似乎唔係短期可以成功。惟有祝佢好運！

手起

尋晚篇文同標題都唔多夾嘅？我嫌下半截未寫完又太過長，惟有斬咗下半截，遲啲寫好先登啦。到時你哋咪知點解起呢個題啦。

開場白講完。

Ａ君想買一樣嘢搞咗三個月都係煲冇米粥，我今日一於同佢對着幹，三個月？我一個鐘都唔駛就做咗個決定－－咪緊張，唔係終身大事，唔係買樓，唔係買車，所花只係三幾百銀。

從此以後，呢個陪咗我六、七年嘅好兄弟，捱盡風吹雨打，終於可以光榮引退，由今晚起響我間房個衣櫃頂安享晚年。當年拎咗佢前一代做收藏品嗰位背囊迷，對唔住，唔好打佢主意，佢表面好似幾企理，實質內裏五癆七傷，今朝先驚覺佢已經穿咗底，忽然諗起入面裝住朋友張相機記憶卡......呵，好彩喺度，冇跌出嚟，嚇得我吖。

浪子？

講啲嘢俾你聽呢......一個故仔，大家有冇共鳴。

Ａ君，年紀三十過外，正在單身中，至少佢認為自己係。身邊朋友近三四年來成日派紅炸彈俾佢，佢已經麻木咗，橫掂佢堅信緣份係一件呼之不來，揮之不去嘅物事－－冇緣嘅話，強求都冇用，真係有緣嘅，打風都吹唔甩。 (* 原來呢個keyword打錯咗，特此highlight更正)

可能因為太多同齡朋友結咗婚甚至做埋爹哋媽咪，佢避免覺得自己年紀唔細但仍舊單身寡仔，愈來愈唔自在，於是傾向搞個年輕化嘅形象。基本上佢閒時出街，着乜嘢衫用乜嘢手機，都好鍾意睇潮流，以二十出頭嗰班年青人做參考目標，並且將朋友關係網一直向下推－－以前響大學嘅舊同學，畢業冇耐就好少聯絡，前五六年開始群埋班嗰陣廿歲頭嘅朋友，到嗰班朋友都開始拍拖結婚，呢一兩年，朋友堆換咗另一班十零廿歲嘅人，唔係呀嗎，成班friend細過佢十幾年，咁都得？但佢又冇乜所謂，而且好似幾樂在其中添，最離奇係Ａ君同佢哋居然好少代溝，反而嫌舊時嗰班同齡朋友太老餅。

Ａ君玩後生愈來愈走火入魔，唔通學古巨基復出嗰時咁樣，三張嘢先至掉番轉頭想做潮人？（雖則Ａ君年紀同古巨基又真係差唔多）佢仲話想補番以前條玩唔夠嘅數，例如想破天荒將成頭黑髮轉顏色，買波鞋、衫褲、背囊要揀特別色又零舍貴嘅款，......，總而言之，據佢話，出街唔好同啲中年漢、阿伯、地盤佬、大陸喱或任何out嘅人撞衫、撞鞋、撞袋......就最好。

但係Ａ君有時又幾死板，睇啱一件嘢想買，但係啲顏色款式唔啱，慌死買錯咗，死都唔肯落叠，堅持等下一水新貨嚟至扑鎚，等吓等，等了又等，眨吓眼，就快三個月，仲未買得成！喂，淨係呢樣嘢，都睇穿佢唔係真正後生一族啦，俾着時下年青人，美女廚房，食咗先講，幾大早買早享受，至多第日出新款即刻換，件舊貨擺上網俾人bid咗佢咪得囉。三個月？潮流嘢都出咗下一代囉。

始終人到咗某個年紀，就算天賦一副baby face，外貌點都會有啲歲月留痕，呃得一時唔呃得一世，唔通有錢到時時去打羊胎素咩？不過Ａ君又未富貴到咁嘅地步，雖然佢梗係想發達......唔該佢清醒吓啦！

誰知問題嚟啦......下篇繼續（我唔敢保證聽日有冇時間寫）

游手

一個樂園，轉眼又荒廢咗成個禮拜。

呢處就快要由日記變做周記，遲啲變埋......月記？季記？年記？

不如將錯就錯，當係周記寫啦。

＊　　＊　　＊

中秋節，下晝天色異常灰暗，間中沈幾粒雨粉落嚟，正式係以前讀國文所謂「淫雨霏霏，連月不開，......」心情都搞到悶晒，簡直一啲過節氣氛都冇。放工時間，彌敦道逢大時大節例牌人多車多，最討厭係人人趕住放工返屋企做節，偏偏四圍塞車，巴士顯得零舍少，等好耐先有車，幾逼都要上，有位坐算你行運。返歸睇天文台衛星雲圖，吓？香港上空冇雲喎，即係點解？灰色嘅天，原來又係煙霧咋。初初以為學舊年咁樣，今晚唔駛賞月啦，點知晚飯後，仰觀夜空，一輪清輝入室，望住個九年來最大嘅月亮，又總算天文台今次冇呃到我。

賞月，好多人揀出街，去公園、海灘，各適其適，半夜樓下仲人來人往，多數係三五成群嘅後生仔女，今晚係大條道理出去玩通宵嘅一晚。我反而有興趣知，佢哋中秋出去賞月，有幾多真係會做足傳統，食月餅，玩燈籠？唏，搵嚟講啦，今晚便利店超市最好賣嘅係啤酒汽水，成班friend難得聚埋一齊，吹水劈酒就最正！唔通我以前識啲朋友正經得滯？佢哋從來唔會撩我中秋夜出嚟hea，依家更加冇朋友「溜」，總覺得有啲若有所失。

所以，第二日幾好陽光都好，千祈咪去海灘晒太陽。我唔想響垃圾堆入面吸收日月精華，身邊啲叔叔嬸嬸痴啅轉起勢響啲沙度搦啲啤酒瓶、汽水罐、煙頭、膠袋......出嚟，救命！

＊　　＊　　＊

星期六、日，連氣兩日紅假，禮拜六本來都係短周唔駛返工，根本同平時long weekend一樣，但望到日曆印紅色，感覺總有啲唔同。朝早冇乜事幹，見房角堆咗一叠冇睇幾日嘅舊報紙，攞嚟睇番晒啲未睇過嘅舊聞，搞搞吓又半日，下晝見幾好太陽，想出街影一陣相，但諗起某朋友講，煙霞勁，影到啲嘢顏色唔夠鮮，可免則免，正響度十五十六之際，朋友打電話嚟，長氣先生一吹水就吹足兩粒鐘，時間話咁快就過，好快天都黑。

禮拜日嘅節目基本上翻抄禮拜六，近來都好少有咁深居簡出：一個禮拜尾放工返屋企，到下個禮拜頭出門口返工，其間成個周末完全冇搭過巴士，甚至一架巴士都冇見過，出門口只係落樓下同屋企人飲早茶咁大把。有時真想試吓，唔出門口就唔剃鬚，連續過周六周日之後，估計到禮拜一，下巴、人中、面頰嘅毛毛可以將兩邊髮鬢連成一線。

＊　　＊　　＊

好少會得閒追睇連續劇，更何況日劇，我唔多鐘意睇靚仔靚女做埋啲「估到結局係乜」嘅戲。勢估唔到魔鬼老師會吸引我連睇十一集，連後加兩集前傳都掃埋。我有啲朋友睇過頭幾集就頂唔順，嫌太誇張，我唔理，劇情鋪排精彩，照睇無誤，結果都冇令人失望－－以前最憎追連續劇幾十晚，點知結局落雨收柴，破壞咗成套劇嘅印象，更會覺得幾十晚睇一個垃圾結尾係完全浪費時間－－今次唔係。做完都意猶未盡，上網睇吓評論同意見，前晚更精彩，發現有個網站會將每套劇嘅主要場景位置點出嚟，連結埋google map，又有相睇，真佩服啲fans咁有心機。睇完個網站，得着係對東京某幾個區認識多一點，但個城市咁大，點樣睇得晒？諗多兩諗，開始心動，不妨飛過去親眼睇睇。

＊　　＊　　＊

手頭上依舊有啲未了嘅計劃同工作，但每日總提唔起勁去做。家吓一上網，入咗 search engine 、 wikipedia ，時間真係好易過，search完一樣嘢又轉去另一樣，好容易流連忘返，兩三粒鐘閒事，所以連呢個blog都時時俾我掟埋一邊。

上網太花時間仲有一個更要命嘅後遺症：變形。返工已經成日坐，返屋企又係坐，早幾日出街，着上一件冇着一輪嘅衫，埋鏡一照，死火！唔着得出街。呢件本來少少鬆身嘅背心，竟然凸顯咗下面個肚腩出嚟。荒廢嘅唔止係呢個blog，仲有以前時時去嘅gym，生活正常化，都應該盡快實行。我有啲肥朋友，全身都肥，冇乜所謂，自己天生骨架細，只肥腰間，好難頂！

秋高氣爽，邊位會同我行山一趟？不過切記要揀日有藍天白雲先得。

兩極

人馬座最顯著特徵係具有雙重性格。我更相信自己好容易傾向兩極。

對一件事、一個人，一係勁愛，一係勁憎，再唔係就完全冇感覺。

鍾意一樣嘢，就要盡量搵佢嘅好處，強化自己對佢嘅愛戴（其實係搵一大堆鍾意佢嘅理由）；另一方面要準備俾其他人批評同挑戰，所以又要盡量發掘佢嘅缺點，比對其他選擇嘅優劣，處處維護佢，搵到缺點，亦會令自己接受，而最終目的，一樣係搵鍾意佢嘅理由。

有時試圖冷靜一下，時時都去窮盡一樣嘢嘅優劣，真係幾辛苦，係唔係值得咁認真？

呢種態度，造就咗一件副產品：一種假嘅品牌忠誠(brand loyalty)。用開某公司嘅產品，就會一路用落去，到舊咗要換，第一個選擇，又去幫襯番嗰個牌子。原因簡單不過－－怕麻煩。因為揀啱一個牌子所花費嘅精神心血都特別多，點容許你成日轉？但當用開嘅品牌聲譽日跌、質素漸差（離棄一個品牌，最普遍原因係冇進歩，款式新不如舊），當越過咗一個容忍限度之後，對佢嘅討厭程度就即刻以幾何級數暴升。

以前逢買產品Ｘ都買Ｙ牌，當Ｙ牌滿足唔到自己，就去發掘另一個新寵兒Ｚ牌，之後對Ｙ牌幾乎有彈冇讚。表現出嘅就係一種兩極態度－－極愛或者極憎。由Ｙ轉去Ｚ，可以係一個漫長過程，當中難免會hit & miss，不斷trial & error，出現Ｚ之前，會有大量嘅Z1, Z2, Z3, ..., Zn, 足以令閣下身心俱疲。

唔止買衫褲鞋襪日常用品，連嗜好、興趣都一樣有呢種兩極心態。於是，當覺得目前嘅生活愈來愈沈悶無趣，就開始一輪對舊生活唔同環節嘅批判－－影呢啲相好無謂、去呢啲街好嘥時間、同呢啲人傾偈好悶、睇嗰啲網好嘥精神......

認真未必係壞事，要花好多心機時間去諗，就唔太值得。更何況，破舊未必立新。破咗舊，戒清晒舊嗜好，立唔到新，搵唔到其他興趣寄托，生活隨即變得乏味、失去目標，後果更壞。

想get along easy，不如喺已擁有嘅事物上面去發掘佢嘅好處，唔好咁容易由愛變恨。另一方面，眼觀四面耳聽八方，睇吓世界咁大，會有更多適合自己嘅事物，俾多啲機會追求更多更好嘅嘢。

牛刀

懶，可以係一種集體行為。

出咗上篇文之後，自己友嘅Blog幾乎全部冇update，我唔寫，大家都冇寫。

事實我唔止因為懶。有好多諗法想寫出嚟，但埋到機又窒住，因為唔知點表達。

最大問題係若要講，就一定講到一啲朋友，對佢哋有一番評論。怕得罪，就唔能夠太直接，但婉轉又好似搔不着癢處，故此打住。

＊　　＊　　＊

換咗新機，應該帶俾自己更多樂趣同創造力。呢個必然啦，唔係又何解要多費銀両？

樂趣之外，居然又帶來煩惱。

當我用新架撐影番以前影開嘅相時候，就湧出一個念頭：殺雞焉用牛刀？

見唔少同業仲係用緊銀色細細部嘅器材嗰陣，不免懷疑：佢哋嘅作品分分鐘好過你喎。橫掂影原相唔靚，都有得後期製作，減雜訊，改色彩，縮像素，貼得上網一般都限咗640x480，五百萬一千萬pixel，又有乜嘢分別？

於是另一把聲音就出現：你有部更powerful嘅新機，應該多啲玩其他新嘢。至少要玩嗰班銀色細機友做唔到嘅嘢，反正你時時刻刻都想表現到係佢哋嘅「另類」，唔止器材，連外型、打扮都唔想同佢哋睇齊－－一班永遠唔認識潮流嘅「世外高人」，一班經常俾其他討論區嘅網民，甚至係自己人取笑嘅人。