企得硬

......祝我好運......

好似真係夠運。一個願望，尋晚達成。

以為好難買嘅嘢，買得到，當然高興。

今日又打聽吓，據講通街都係貨，實在唔駛緊張。根本炒唔起。

所以，堅持係有道理。

堅持唔落訂，堅持唔買貴。總之唔俾炒家賺我嘅錢。

○六年下半嘅願望，滿足咗一個。

運勢又有冇得繼續？

......車！頭先至話唔講運氣......

......只要有決心，鐵柱磨成針。

＊　　＊　　＊

聽朝一早又去一個長命party，我原來唔經唔覺連續去咗十三次，足足十三年！

帶件新玩具一齊去，多一重樂趣。

幾乎以為可以帶多一件新嘢，好事不妨成雙。

不過剛剛last view唔見。
（但今日響街竟然連中兩元）

唔緊要，世事冇完美嘅。

太完美，對於我講唔係好事，禍兮福所伏，樣樣都咁順利，隨時會有其他意外事情，就反而不美。

掃垃圾

好快趣一個月冇寫嘢（懶！）眨眼新一年又到。循例學似呢位仁兄咁，回顧過去，展望將來。

2006年俾自己一個最大教訓就係：錯失機會。

好多嘢到位就一定要上，手快有，手慢冇。睇多陣都死。

荷包有錢都冇用，合心水嘅嘢，見到要即刻買，唔即刻都要第二日買。經濟好咗，個個肯使錢，袋住張咭去買嘢都搞到要搶咁滯，搶唔到就冇，冇貨就會有人上網炒。

我最討厭一件普通貨色都可以炒到上天花板，今日炒得起，聽日必定炒得冧。

問題係，你敢唔敢等佢冧價。最怕冧價嗰日，個潮走咗，你重敢入手接貨，分分鐘佢變成負資產－－用咗會俾人取笑你out，送俾你都嫌阻碇。

猶豫，令自己浪費時間。但亦唔係冇好處。佢可以幫你使少好多錢。

除咗唔好猶豫，第二件事，唔好靠估，每事要問，問到清楚為止。

尋晚發現自己冇問清楚，做咗傻仔，無端端浪費成個月去等一件貨。

話說幾個月前，知道某品牌出新貨，個spec好啱自己用，某君自動請纓話去舖頭X幫我訂，之後就大安旨意等人call。

件新貨一再delay，上個月終於有得賣。大家都知新貨第一水貨源少，必定供不應求，冇call？冇所謂，等多幾日囉。其實自己日日放工，路過旺角，隔離街有舖頭A,B,C,D,......，間唔中有貨到，有心嘅，問多幾次，一早買咗返嚟囉。就係訂嗰陣話有個筍價（查實平唔夠10%），先至唔主動出擊。

尋晚無聊，上去舖頭X八吓：
問：「件新貨到咗未？」
照例答：「未返貨。」
問：「我一早訂咗，返咗貨賣幾多錢？」
答：「有冇落過訂？有就照訂單價。」
問：「冇。」
答：「淨係留名訂？咁就以時價計。不過呢件貨缺得緊要，而家做緊好貴！我個人都覺得太貴！」

當堂面黑走返出去。

難怪人地講早買早享受。等咗一個月，原來係白等。唔止浪費時間，更衰係呢一個月件貨愈炒愈貴，當初舖頭A問佢有現貨賣仲係原價，而家？......

祝我好運。