頂天立地

〔呢篇文，不經不覺雪藏咗半個月，先攞番出嚟埋尾。估唔到歷史今日重演。三月一日〕

今日返咗有史以來最長嘅一日工：朝六晚九，差不多十五個鐘頭！

可以用「頂天立地」嚟形容：今朝我第一個返寫字樓，最後一個熄燈鎖門走嘅又係我！

「頂天立地」呢個詞以前喺中大常用，意思係指一種最差嘅返學時間：一日裡面要上第一堂（八點半開始），又要上最尾一堂（六點半完），以每人每周返廿堂計，平均每日四堂，假如真係「頂天立地」，早堂與夜堂之間，可以有四、五個鐘頭空檔，有宿舍重可以匿番自己個竇，走讀生呢......想離開校園，交通費時失事，唯有留低，嘆句：大學之大，何處容身？要成隻幽靈咁四圍遊。

而家返工頂天立地，中場冇得攤抖，除咗午飯時間大半個鐘外，一直唔停手咁做。

點解？好多嘢趕住年尾前要完成，搞掂晒先有得放長假，全日都係同電腦、打印機同影印機周旋，只係要印製大量乘客通告，配合過年期間好多大型活動，唔少地方要封路改道，要響車站張貼大量通告。今日起碼出咗二百幾款通告！

每張通告用一張紙印，底部墊多張硬咭紙，出面再加防水透明膠袋，只係俾乘客睇三幾日，過咗期只能全部棄置，唔可以回收，非常唔環保！所以我接手之後，着力要將掛街嘅通告盡量減少，理想目標，每個站只掛一張。

電腦化、資料庫對呢個「度身訂造」工程不可或缺。做法係，用資料庫搵出所有需要掛通告嘅站，每個站有幾多條線，用power point畫通告，每張通告都用一幅街道圖做底，上面畫行車路線、點站位，每頁只適用於一個站。每次大改道，影響百幾個站，一個ppt file有一百二、三十頁。好在要畫嘅幾十條路線，可以歸納為大約十種行法，同一條（應該話同一組）路線同時出現喺唔同頁次，只要copy & paste就得，唔駛逐張畫。

聽來好似幾易，但事實上每次都高估自己能力，東畫西畫，copy & paste好快，但改正工序往往大失預算。最麻煩係做校對，每一年嘅通告都係依照舊年嗰份改，但每年車站位置總會有啲變動，改道方式又有唔同，一定要心水清，知道邊幾個站要改，邊幾條線要改，但總有機會錯漏。百幾個站，每個站三五條線至十幾條線都有，換言之有成千個item要做校對。

畫完以站為基礎嘅地圖通告，又有按路線分頁嘅文字通告。呢啲通告要貼巴士同埋貼指定車站。第一，要計每條線有幾多架車，印幾多張派俾邊個總站，第二，選定邊啲車站要貼通告，由資料庫篩選出有關車站，計每款通告印幾多張貼響邊，全部要自己慢慢嚟。一坐埋位，就係開電腦，window 1係power point，window 2係ms word，window 3係excel，畫完地圖打字，之後用excel做sorting, filter......

印好晒通告，重要自己埋影印機，逐份按自己嘅名單影印。二百幾款通告，合共印二千幾個copies（今日一捻紙俾我用晒），然後再分區分站一叠叠砌好，等同事返公司攞出街派。唯一可以俾寫字樓同事幫嘅，就係包膠袋、打釘咁多，其他嘢，全部靠我個私家excel file做。

有人問：你駛乜咁辛苦？以前冇你嗰陣，佢哋都係搞得掂啫。有時的確會咁諗，變番舊方法囉，搵舊時班同事快快手打起二、三十款通告，每款影印一百幾十份，張張都包膠袋，由得街外嘅同事四圍貼，唔夠貼返嚟再影到夠......對唔住，我起咗步，就唔可以行回頭路。

我自己以前見過油尖旺嘅巴士站，一條柱掛十張八張通告，由站牌貼到落地下嘅可觀景況，大節日過後，街邊垃圾桶俾過期通告塞到爆棚......大家都應該為環境負番啲責任，而家每個站通告一張起兩張止，唔係企理好多？

又有人問：你成世喺度做咩？你始終有一日會走，不如搵接班人啦。講真，即管試吓將我電腦裡成個通告folder俾晒我同事，word、excel、power point files一大抽，教吓佢哋點整囉，又唔係由零開始，每年做updating、maintenance之嗎。我諗，可以嘅，但係唔好叫我教。

我呢種人天生勞碌命，只可以打人哋嘅工。俾個老闆我做，我會叫救命，我最怕點人做嘢，因為伙記假如錯咗，最終都係我負責，A君做唔掂，換阿B君代替，但邊個B君先可靠？人嘅個性同工種要有好微妙嘅配對，我喺呢方面嘅判斷力好差，唔識搵個最能幹嘅人做一樣嘢，不如接個job返嚟，自己親力親為好過。

〔後記：呢篇文係講二月十四號嘅事，收得工嚟九點，一出公司，就搵架最直接嘅車返歸，連飯都唔好出街食－－每年只限呢一晚，避免一個人出街食飯，更加不適宜一個人通街逛，否則，會有被異化嘅感覺〕

懶

二月十三號。上篇文係一月十三號寫。又隔足足一個月。

明明上篇文只用15分鐘寫得完，非常簡單嘅任務，一個惰性，足以令你提唔起勁開新文。

有朋友好希望我寫多啲嘢，偏偏硬係左推右拉，冇心機坐定埋位開筆（鬼會用紙同筆咩，按鍵盤之嘛）。

點解？有嘢想同朋友講，唔係去打keyboard，而係打keypad，手機嗰塊，打俾佢傾最直接。

話不投機半句多。但相反嘅話，煲一兩個鐘頭電話粥，閒事矣。

＊　　＊　　＊

上篇文提到一個連續十三年都出席嘅活動。今次冇例外，依舊出席。

雖然大家都認為搞咁耐，一早冇晒新意，更不幸係規模同參加人數都係一年不如一年。

對我來講，活動本身有冇新意，甚至人氣多寡，已經唔重要，最重要反而係參加者，一班相識多年嘅朋友又再共聚一堂，喺一個熟悉嘅環境裡面，無聊嘻哈過半日，已經係一種享受。

上年散場嗰陣，重有餘興節目，大棚人一齊去下午茶晚飯直落，天黑先至散水。

不過今年就差啲，好多人似乎前一晚捱夜捱得辛苦，一散場就各自歸家，響巴士上邊，只見大家眼神，都透露緊一個字：「瞓」。

冇所謂，撞啱今晚係我嘅family day，大佬家姐返晒嚟食晚飯，我都樂得返自己屋企。

＊　　＊　　＊

近半年呢度寫咗好多「應唔應該......」嘅文章，而家睇番，連自己都覺得悶。後期更加俾朋友串：咁小事，何必睇到咁大？啱，的確冇需要咁多偉論，我咪停筆囉。但係一日未了結，一日都手痕要借呢度發表吓感受，於是唔敢直接寫，改做打個比喻嚟寫，搞到懶隱晦，隱晦到只有一位讀者知道（因為有我解題）。

好在呢個混沌時代，比狗年更早結束。雖則寫咗好多悶嘢，但可作為一面鏡子，反映自己嘅價值觀。