今日係禮拜日，朝早好早瞓醒，食完早餐都一輪，依然冇乜嘢細藝好做。
本來禮拜日應該好唔得閒嘅，可以去影相，可以去打雀，曬太陽又得......偏偏今日冇太陽，家吓又沈咗一陣仔雨，不過我寫完呢篇嘢都會出吓街，博吓陣間天色可能好啲。
有朋友用心良苦係佢個blog寫咗一篇長文，好抱歉，因為篇英文太多生字（對我來講），睇咗頭一小段就冇興趣睇，頭先至俾些少心機再睇，至發現佢係講緊我自己。都好嘅，原來小弟個blog寫咗咁耐，時常寫埋啲又長又臭冇乜圖片嘅文章，原來有長期讀者架！
佢好耐以前已經抱怨部電腦個OS換咗就打唔到中文，從此只可用雞腸發言，我都好努力去鑽研佢嘅文筆，對唔住，好多嘢到而家都唔係太明白。文中經常拼錯字，濕碎料啦，我都認得出睇得通，最麻煩係一啲詞語嘅意義，我同佢嘅理解唔相同，佢嘅文章艱深難明地方就係呢度，以我嘅有限才智點推敲都推唔到。
不過，我對「Gloomy Sunday」一首歌完全冇感覺。
第一，未聽過呢首歌。
第二，睇完佢開文引述嘅歌詞，冇共鳴感。
照佢講，我嘅性格好有問題。我自認個性唔完美，佢所講某程度係正確嘅。但要跟足佢嘅提議做，都幾理想化，甚至可謂不切實際。文人寫嘢，點都要肉緊些少，誇張一Ｄ，先吸引到人去睇。
講做嘢，理想係至善，現實最醜惡。大機構同小機構分別就係，大機構分工精細，有Ｄ嘢唔到你控制，例如你只係做廚師整餐俾人食，一個餐用乜材料，整幾多份量，係老闆限定嘅，你根本冇權力去改用料或者改大個餐，就算老闆准你提意見，但最後都唔睬你，你日日去嘈佢咩？朋友做開細公司，以前有本事當面插個廢柴波士（據佢講又真係廢柴一條），唔知呢個世界艱難架嘞。
其他做人處事嘅建議，講得幾冠冕堂皇，不過只有空泛嘅大原則（嗰啲我都識），睇完都冇乜幫助。文章後半部份，對唔住，暫時唔想評論，因為好多文法同用字有歧義，強行去理解，錯誤機會好高，口同鼻拗就無謂。至少我唔明點解佢會話我「響度呃緊自己」（希望我理解錯）。
最尾講到我好似冇得救咁，「因為佢睇嚟要避開我......」，吓？我一直都喺度喎，起碼我未試過拒絕聽佢嘅電話。佢鍾意開文章寫人（至少寫我），但佢唔會響我面前講，點解？我冇收佢電話都有幾個禮拜。佢經常認為我嘅溝通方式好唔妥，但彼此響網上自說自話，唔通又係一個好嘅溝通方法？
3 則留言:
我又睇多一次嗰篇文，個立論認真奇怪，佢覺得我係逃避緊一啲事實，所以要扮年青十年。
可能（一）：你嘅同輩個個都拍拖結婚生埋仔，你連第一步都未行，為免突顯你嘅失敗，於是刻意埋一班廿歲出頭嘅堆。
可能（二）：你去扮後生，但根本樣貌外表上已經有一啲破綻係你遮掩唔到嘅。
佢話「我同班朋友講起」，好似呢啲係集體嘅意見，聽你頭先講，又唔多似。
一個望落幾完美嘅因果關係：
逃避失敗->拒絕承認事實->假裝另一種年紀
打扮得年輕一啲，係我個人風格，近十年八年我一直都係咁，唔係最近嘅事，更加同伴侶一事無關。事實上，呢樣係由我一啲女性朋友推薦嘅，佢哋而家都話我襯得唔錯。
或者近兩年接觸多咗唔同品牌（有啲都係拜佢所賜），選擇更多，唔覺唔覺或者個look比舊時更起眼。點解我會咁樣揀，說來話長，而家暫時唔深入討論，遲啲適當時候慢慢講。
p.s.熊兄，剛才一啲問題，請pm嚟俾我回覆。
佢個人係點，我哋都清楚。憑佢喺齋talk一啲文章，都知道佢鍾意包拗頸，仲係明知冇結果都要無厘頭拗一餐嗰隻，我直覺認為佢呢篇都屬於遊戲文章，頂多都係半認真半講笑嗰種。
我寫blog係心想到就會落筆（唔啱，邊有筆？按鍵盤之馬），啲感情會出埋嚟，或者你睇完會覺得我比較肉緊。
我比較面皮薄，唔係太抵得俾人話（呢樣源自我嘅成長經歷，有興趣遲啲慢慢講），遇到一啲對自己嘅批評，都會認真去諗佢講得啱唔啱，係真嘅就檢討，唔係就一定會反駁。當疑團未解之時，我會假設啲批評係啱嘅，然後逐一搵破綻。
因為佢話「同班朋友食飯時講起......」，我直覺以為係你哋都有同一想法，所以搵你求證，又問埋新界西嗰位，哦，家吓放心晒。
人唔可以孤立，孤立咗，有嘢只會向壞嗰面諗，就唔會有自信。當愈多朋友支持你，做人就可以樂觀積極。
p.s. 一直都同你用SMS聯絡多，傾偈機會少，估唔到前晚一個電話都可以傾大半個鐘，由廣華醫院門口行上潮流特區轉個圈落返嚟再搭車返黃埔行到屋企樓下先講得完，你都幾nice，第日可以傾多啲。
p.p.s. 講開中大影相，嗰陣路人兄好似俾咗佢個醫貓我，但我唔見咗，可以問佢攞番嗎？嗰次波哥有冇嚟？成日見佢響網度出現，不過我唔認得佢。
發佈留言