status quo

好快就過咗兩個禮拜。

Ａ君同Ｂ君有乜嘢進展？

探子回報返嚟，係冇。

此期間，Ｂ君同Ａ君食咗一次晚飯。但約實之前，Ａ同Ｂ都各自「稱病」推咗對方一次，最後見面日子同原先距離差唔多半個月。

Ａ君本來諗，Ｂ君冇見成年幾，會唔會有啲改變，令自己眼前一亮？上次食飯發生咗件不愉快事，因為嗰間餐廳出品失準，食到一肚氣，所以Ａ君都有啲擔心，因為幾時都應該係男方揀地點。

今次Ａ君揀最近同老死食過嗰間餐廳，除咗覺得上次幫襯無問題外，更重要係比較清靜，唔駛等位－－而家好多名店寸到唔俾訂座，就算訂咗，去到都要排隊輪位，一男一女約食飯點可以罰企？有得必有失，點解呢間嘢又好又唔駛等？當然係比較貴。

Ａ君見到Ｂ君喇，心情好似天氣先生預告密雲天氣咁：「呀......哦」，Ｂ君樣子同以前幾乎一樣，冇驚喜；而且仲有個問題：Ｂ君收咗工就即刻去，Ａ君係堅持原則，返咗屋企再出嚟，所以Ａ君casual look VS Ｂ君 office look（仲係着裙嘅極decent樣），呢點令Ａ君全程都感到有啲唔自在。

衣着差別都係小事。最麻煩係，Ａ君諗，如果同Ｂ君係拍拖，呢個應該係心聲交流嘅好時刻。坐落叫嘢食，Ａ君發動口部機器準備雞啄唔斷，最後如其所願－－個口真係唔停－－唔停咁食嘢，因為兩個人叫咗份火鍋大餐，仲係極速上枱嗰隻。Ａ君準備咗一連串問題，關於Ｂ君近年動向，到一輪風捲殘雲完畢，都只係問咗極之少。Ｂ君又透露，近排忙到死，因為有幾位朋友就快結婚，工餘時間要幫手搞婚禮，今晚都唔係好得閒，食完要盡快返歸。既然係咁，當啲嘢食完，Ａ君惟有識趣地叫埋單，出門就一直行－－唔係行出海邊吹風，係行去地鐵站。本來Ａ君想表現吓君子風度，送埋佢返屋企，但係連環遭受冷待下，去到入閘機前都係同Ｂ君講拜拜。今次約會快過打針，見咗唔夠兩粒鐘，僅僅九點正散場。

上次Ａ君錯過咗Ｂ君生日，要Ｂ君嗰晚食完飯至醒佢，Ａ君今餐當然唔敢唔請。但Ａ君響同Ｂ君sayo之後，竟然覺得呢餐飯使咗四舊水好肉痛－－睇唔出Ａ君係一個咁孤寒嘅人。難怪，鬼叫Ａ君今次一啲着數都冇，以為會有進展，查實只係原地踏步。

Ａ、Ｂ君嘅差距依舊好大，一切不變，而Ａ君睇來冇乜動機去再約Ｂ君出嚟。