秋春夏

如常一個長週，要返半日工。

十二年來，返長週嘅下晝，八成機會去上面呢個地方，睇我鍾意嘅書刊報紙，見到有我認為好嘅圖文，就影印做參考資料。

不過，返去同人影畢業相，只有兩年前呢一次。

希望戴四方帽嗰位主人翁唔好介意：嗰陣我同你唔係太熟，唔多話題講。今時唔同往日囉。 ^_^

相中唔計自己有六個人，當時只識得其中兩個，家陣識齊晒（當然重有其他冇出席嘅朋友）。

本來好想將幅相打格仔，但好似唔多尊重人哋，既要打格，又要貼上網，根本係自相矛盾。其實打格仔嘅原意係要遮住自己個醜樣－－嗰日用錯set頭工具，加上一啲意外，整咗個我最討厭嘅髮型出嚟，臨場冇架撐，欲救無從。

＊　　＊　　＊

今日，陽光普照。好熱。

入到睇落冇乜變，實情漸漸喺度變（係愈變愈醜，因為不斷起高樓）嘅校園，通處都係怒放嘅杜鵑花，抬頭一望山邊，火紅嘅木棉花都開晒。

木棉花開，炎夏快來。唔係嘛？聽日先至係新十五，今日重算過緊年噃，夏天咁快到？

我個人偏愛夏天多過冬天，但咁快趣熱番，肯定唔係好事。

只不過印證，地球發緊燒。科學家警告我哋，過多幾十年，我要游水返自己屋企，因為海水愈來愈漲，我住個區遲早會變成海。

前兩年買咗件輕身又夠暖嘅行山品牌外套（唔係羽絨嘅普通貨色，不過都賣過千銀，幾乎貴過件西裝褸），每年都會有三幾日凍到低過十度，要着佢先出得街。呢個冬季冇掂過佢。着呢件大衣次數，係冬季似唔似樣嘅指標。今年呢個一啲唔似係冬天。今年經濟旺，行行賺大錢，惟有服裝店斯人獨憔悴，因為寒衣完全冇銷路。

恐怕香港就快變成著名六合彩主持人嘅真名一樣，「唔要冬」。

今朝着一件長袖恤衫，外加一件羊毛衫，返到公司後，羊毛衫除咗落嚟，一直到返屋企都冇再着到，上身只有一件薄衫頂得晒，行得多重要出汗呢。（得一件衫？冇錯，我今日「真空」上陣）

頭先睇天文台網頁，下晝氣溫有廿五、六度，難怪。而家埋位打文，就係同夏天一模一樣，不折不扣嘅短褲背心look，差在冇開冷氣啫。



估你唔到，敝家今年已經有開冷氣嘅紀錄。年初二下晝依傳統，全家一齊食開年飯，嗰日冇今日咁熱，但我侄仔一坐落飯檯就嗌熱，手快快開咗大廳個冷氣掣，於是就享受咗2007年第一次屋企歎冷氣。

我哋屋裡邊涼，熱氣噴晒出街，地球於是更加熱，幾罪過吓。

憑侄仔嘅敏捷反應，我相信我大佬屋企今年應該開過無數次冷氣。

侄仔拜完年走後，我即刻將冷氣機身嘅大掣擰去"off"，撳牆上冷氣掣都唔會着。應該遲Ｄ再用封箱大膠紙黐實冷氣機panel蓋，四五月之前唔准撕。

好熱，着衫少咗，照鏡多咗，因為要留意吓自己體型，提防拜拜肉，鬼祟肉現形。最難睇係自己條腰，鬼叫日日返工、屋企都坐響部電腦前面做人咩。由細到大，老媽子成日嫌我瘦，擔心身子弱（小學五年班全班度高磅重，我榮獲體重亞軍－－由最輕排起），呢一兩年掉番轉要小心過重。我計過自己BMI升到24，剛剛高出「標準」範圍。

健身中心開始踏入旺季，時時爆棚，我反而要多啲去同人逼。

幾年前某次遊船河，貪得意響沙灘叫朋友幫自己影低一幅「玉照」，嗰陣嘅身型係我歷來最好嘅。認真來講唔係太好，的確係冇肥膏，但略嫌單薄，多啲肌肉就perfect啦。幅相重做埋大相，而家都唔知攝埋邊個角落。

換季囉。我嘅買衫目標，睇嚟只有短袖衫、短褲甚至冇袖衫；鞋都應該要買（老人家話起碼要等到3月19號至好入貨喎），鞋款呢，或者要俾腳趾透透氣。

p.s. youtube問題已解決，多謝網主！ ;->