馳車天地

唔好誤會今日我去咗迪士尼。

作為香港人，我寧願去土炮海洋公園，都唔恨去嗰家的骰到極嘅洋貨遊樂場。

今日只係一個平凡無奇嘅踩單車活動。

雖則平凡，都冇玩兩年幾。

老友更精彩，佢話十年（！）冇踩過單車，先旨聲明，要全程睇實細佬咁話。點敢唔等你啦，大佬！^_^

當年唔係愛上咗單車，可能我嘅體高會少幾吋。

曾經係班裡面第二最矮、最輕嘅同學（只計男性），最近至聽聞老媽子嗰陣擔心到極，驚我大個咗會成為一個細細粒粒嘅藥煲。我嘅發育期真係遲過人，中一、中二身型先開始大變，兩年間標高八吋，體重增加四十磅。呢個就係我玩單車嘅高峰期。

或者，我鍾意操縱機器，更鍾意用機器帶自己四圍去。

理論上，我應該熱愛駕駛，十八歲即刻去考牌，養番架車仔。

結果係，當日運輸署考筆試，我係全場最老餅嗰個。

個車牌攞咗三年，雪足三年，三年之後又三年，我估都一樣。

冇錢養車揸車，踩吓單車囉。對身體更健康呢。

而家嘅單車，一樣可以入波，上斜平路，隨意選擇，當然要用自己嘅體力。

近排太多節目，屋企又多嘢整，唔係好夠瞓，尋晚重唔係好舒服，覺得呼吸有啲唔順，以為今日要缺席單車之旅。

無端端透唔到氣，我試過好多次，但有人話唔駛擔心，可能不過係輕微驚恐症。

太耐冇約人戶外活動，可能會有影響。第一，驚體力透支，中途唔妥會好麻煩，更怕衰俾朋友睇（吓，乜你咁潺㗎！）；第二，萬一真係驚過籠，朝早唔舒服到起唔到身，失約就更加唔好。

好在今日天氣唔錯，心情大好，一切順利進行。