風大雨大

由某月某日開始，講一件事對或錯，變成一件好複雜嘅事。

由某月某日開始，好多事情似對非對，似錯非錯。

由某月某日開始，無論你贊成定反對一件事，總有好多激烈聲音去批駁你，甚至將你妖魔化。

由某月某日開始，無論你贊成定反對一件事，總有人將你定性、歸邊為一啲你絕不認同嘅族群。

所以，只有無言，做旁觀者，無謂表態。

就算有千言萬語真心話，話到口邊，字到手邊，都要懸崖勒馬。

真正感受到資訊爆炸帶來嘅壓力。

每日上網、睇電視，見到好多班人嗌交、晒馬，為咗爭論一件事啱定錯。

覺得煩，唔想睇？擰轉頭都要返去睇，唔理嘅話，好似對唔住其中一方，因為自己嘅價值觀認同其中一方。

不過，理又如何？一出聲，一定有人狂鬧，唔係東邊鬧，就係西邊鬧。

聯署啦！聯署啦！係喎，佢哋講中我心聲。寫完自己個名，準備按"submit"掣，忽然諗到：我隨手拎本舊同學通訊錄，逐個名打入去都得喎！不過係晒馬遊戲啫。收手。

當有人要「玩大佢」，更多人被扯落水，只有嘆句：沒完沒了。

不折不扣嘅小事化大。好煩厭，偏偏有人樂此不疲。

幾時收科？自我收斂應該冇可能，恐怕要用另一件更大更轟動嘅事嚟蓋過。當大眾焦點移走咗，呢邊自然收晒聲，但係一切衍生出來嘅討論，即使有意義嘅，都會被棄如敝履，到頭來，原來得個拗字，冇結果。十足十一班快閃黨，呢處有issue，千軍萬馬突然洶湧而至，唔知幾時又極速消失。

呢種就係我哋嘅新世紀生活態度。

想知我嘅睇法，我只會答：
有一份報紙，我已經冇買十二年。
但呢十二年，我每日都會用任何免費方法睇佢，因為我日日都想睇，佢點樣攻擊我支持認許嘅人、團體同思想。