從新開始

今日試吓多圖少字。

副新架撐今日面世，要操吓佢，當然要去新舊交替嘅中環。

新機好唔好用？認真講，唔可以俾滿分，一分錢一分貨，有時優質同方便係要從中取捨，想啲相靚到爆，千祈咪怕麻煩怕論盡，好難怪人哋吓吓要孭一大舊鐵出街。我幾時會做到咁專業？咦，又一個人生目標嚟喎，俾三幾年時間我啦。



呢幾日，試新嘢的確有精彩發現。啱傾啱講嘅人，其實身邊仲有，只不過一直以為佢哋唔係，冇去發掘啫。放低成見，由另一個角度出發，人生色彩又豐富一啲。

我唔太識得玩相片效果，執相嘅嘢，都係睇多啲photoshop嘅書，多啲觀摩人哋嘅作品先得。

雨過天未清

一連幾日雷雨天，悶到就發癲。今年見陽光嘅機會少咗，成日灰陰陰，心情都會差啲。

今日冇雨落，不過天色依舊麻麻。應該要認真支持「藍天行動」！

睇完文唔好以為必有人回文，但冇回文又毋須失望，咁樣唔等於冇人睇過。

回覆可以用唔同方法，我用手寫，你用口講，一樣可以。溝通，唔需要限制用對等嘅方式。

一篇blog嘅回覆，唔一定要寫喺嗰篇文嘅尾。可以響自己個blog上面寫。何必自尋煩惱，甚至發脾四有意罷寫？（但如果今日篇文嘅回應原來係覆前幾日嗰篇，就好奇怪）

所以，好熱切期待「一個新blog嘅面世」。我只知呢片新地帶沙塵滾滾，正在動工中，尚未開放。或者佢鍾意grand opening啩，我求其好多，開咗blog戶口就即刻出文，soft opening啱我。

冇咁熱，可以去行吓山。行山最大樂趣係去到高處遠望無盡美景，就係最大回報，足以忘卻上山嘅疲勞。眼睇唔足夠，更需要留下回憶，相機係必備。上次行山已經係前年嘅事，2005年交白卷，而且最遺憾，嗰次行山雖則有陽光，但遇上大敵：煙霞。去到山頂，遠少少嘅大廈同山巒，只睇到輪廓。時常有人講，大雨後可能山洪暴發，唔適宜行山；計我話，想登高峰影靚風景，最好揀連場大雨過後嘅晴天，因為空氣必定潔淨，視野最清晰。高回報，必定高風險。

應該係時候約朋友再出發。

對自己寬容

以前我寫過呢篇文章，忽然覺得，風水輪流轉，我自己愈來愈變得似文章入面嗰位我好討厭嘅同事－－一樣死纏爛打另一個人。

世事冇完美。甲君同乙君趣味相投，一見面一通話可以雞啄唔斷。有啲人際關係只係單向，我鍾意搵你傾偈，但你唔想同我傾，響電話講幾句已經好唔耐煩，趕住要收線。

話不投機半句多。理智會同你講，既然人哋唔想聽，你再去煩對方，只會惹人更加討厭。但感情經常蓋過理性，當你覺得對方係唯一可以分享一啲事情嘅對象，佢唔睬你，你又搵唔到第二個人去講，隻手自然又去撥佢個電話，打得多，連自己都唔好意思，好似騷擾緊佢。

好啦，寫到呢處就算。人哋或者根本唔係咁諗，不過唔得閒應酬自己啫；寫得愈多，愈被誤會我對佢有偏見，弄假成真就唔太好。

人生不如意事十常八九，對現實開始感到煩悶厭倦，不如另闖一片新天地。被動不如主動。現實唔理想，改變唔到，可以試一個新環境，認識新人新事物；舊嘅生活方式愈整愈冇趣味，搵多啲新嘢試吓。

堅持有時係美德，過份堅持變死板。

一架巴士開走咗，死都要等下一班先上車，原來走咗嗰架係尾班車，冇得等。有咁多巴士你揀，搭第二條線，或者行遠幾步路先到，或者要轉車，但行程可能別有一番風景。「唔好為一棵樹放棄一座森林」，呢句老話，唔單止應用於愛情，適用地方仲有好多。

以前買一樣嘢，總要問清問楚，搵朋友打探攞意見，或者上網睇無數個討論區，直到認為目標物品無懈可擊，係最好嘅一件先決定買。定個咁高要求，其實幾辛苦，單係搜索呢個過程就極度浪費時間，而且世上絕對冇一樣「最好」嘅嘢，皆因「好」係主觀嘅，因人而異。更何況我討厭二手貨，人人讚好嘅嘢，遲啲手隨時冇得買。所以，應該開懷一啲，唔需要「最好」，只要「好」就得......

......於是，今日決定做白老鼠，只憑一啲初步資料，買咗一件未有太多人評論嘅新產品。與其寄望人哋俾好嘅評語，不如自己俾，更重要係，容許自己俾壞嘅評語－－假如真係有。對自己寬容一啲，買錯咗唔等於世界末日。

紅燈？綠燈

當我喺度講是非、發牢騷嘅時候，心裡面係諗：乜嘢人會入嚟睇？

呢個blog有度唔好，就係冇counter計每篇文有幾多人睇過。不過人流其次，最重要係哋有冇人肯回應。

好多朋友都勸我blog唔應該太過長，所以我一直都盼望每日一篇文唔好用超過15分鐘寫，結果，呵呵，永遠都超時完成。

對於寫blog，有時會感到意興闌珊，因為冇乜人回應，好似一個傻佬自説自話。於是會懷疑，朋友係唔係睇緊？冇嘢搵嘢寫，真係幾困難。

同人溝通，言語點都親切直接過文字，雖則文字感染力又大過語言。

當有好多想法，冇辦法用言語同朋友分享嗰陣，唯有借呢一片空間用文字表達。

點解會「冇辦法分享」？我唔係忽然啞咗，只不過時常唔好彩，遇啱一班話不投機嘅人，講心事佢哋都唔明，牛頭唔搭馬嘴，自己都費事傾落去。周時有呢種日子，幾悶蛋，但又冇辦法。

當認真冇人分享嗰陣，積壓已久嘅感情一湧而出，自然會迫自己埋電腦去寫寫寫，禮拜日嗰篇屯門文章就係咁樣誕生，個人幾疲累都要寫，最後仲愈寫愈精神。

近來種種迹象顯示，我應該要停一停。但轉頭又諗深一層，停咗個blog，如果一樣冇人分享，就連呢一個溝通渠道都失埋，冇人應都即管試，今日冇作品，聽日開一篇，始終會有人睇。

有希望，先鼓勵到自己繼續。至少學似依家咁，隔日開一篇。

p.s. 「我有好多嘢想講」、「我有好多嘢想問」......勢估唔到諗到問題要用紙同筆寫低，因為由想問去到搵到識答嘅人，可以花十日八日、半個月都唔出奇，唔記低嘅話，到時搵到嗰位仁兄嗰陣會隨時唔記得。

p.p.s. fans們咪誤會我討厭軟硬，《好兄弟》唔係一首差嘅歌，只係對我來講，聽完永遠有唔愉快嘅聯想，假若消除咗呢啲不快聯想，我對呢首歌嘅印象會好好多。

熱變涼

周末翻北風，隔晚涼咗七、八度，呢幾日多咗一陣秋意。

秋天，應該係秋高氣爽，郊遊嘅好日子，而且可以幫大家慳電費，唔再需要開冷氣，但可惜涼得嚟天陰陰，陽光少，反而帶俾人憂鬱。

所謂「秋意肅殺」，大概係咁樣形容。一年之中我最討厭十一月，因為日落時間最早，未到六點天色就黑齊，放工搭車一路望住個天由光變黑，感覺係一日又完結，總令人提唔起勁。近排嘅天色，同十一月有幾分相似。

秋意總令人回憶過去嘅夏季。套一句學生開學後，最鍾意問同學嘅説話：大家呢個夏季過得點樣？

每一年夏天都打算有幾次戶外活動，當然最舒服係去海灘啦，唔通三十幾度博中暑去行山咩。不過今天我嘅「業績」最差：只去過海灘一次。五、六月嗰陣落長命雨冇去過，八月時時放短假應該可以去多啲，偏偏唔多順利，一係天色唔夾，一係自己有其他事幹（更離譜嘅理由都有：瞓晏咗），食晒白果。

唯一去過海灘嗰一日，返來之後行街，就開始咗嗰個「長壽」嘅買袋遊戲。對唔住，又違諾舊事重提，不過真係最後一次。呢個計劃終於告吹啦。原來由第一日開始，嗰件心水貨色一早已賣晒，到依家都未見「翻貨」（聽聞品牌A唔興咁樣做），諗咁耐，腦筋只係空轉，冇結果。我又最討厭用Ｎ手貨，唔駛旨意我上yahoo, ebay問人bid。

講完事情嘅負面，應該掉轉講吓正面。夏天日日熱辣辣，着一件衫出街都嫌多，流晒汗又難頂，秋天可以開番衣櫃攞多幾件衫配襯，出街打扮唔駛太悶，好過夏天只着一件衫一條褲，隔三幾日又翻炒。去海灘？九月之後點會冇機會熱番啲？前兩三年十一月都試過去海灘晒太陽啦。買袋計劃？買唔到嗰個心水款式唔係終結，反而係重新開始，失去一棵樹，等自己認真睇清成個森林，俾自己從頭選擇，可能會有更多驚喜。

p.s. 近排音樂心水：
最愛：《十分愛》（好少聽）
最憎：《好兄弟》（聽到厭）

寧靜與熱鬧

一個理想嘅居住地點應該係寧靜或係熱鬧？

一年前，寫過一篇 不安於室‧星期日，我係不甘寂寞，最怕靜，怕得要死嗰種。尤其係星期日，要困響一間冇人嘅屋，望出窗外都係靜幽幽，冇厘人氣，真係幾難受。

所以，雖然係嘈啲，廢氣又多啲，我都堅持住番市區，仲要樓下係馬路有車行就更加正。

上面篇文提到我細個住嗰間故居，樓下係掘頭路，冇車行，禮拜日可以用死寂嚟形容。八、九歲有一晚，發夢見到樓下條街改建，街尾打通出面條大馬路，可以行車，樓下仲有個巴士站，時時刻刻有人上車落車，人來人往，好開心.....瞓醒後，知道只係一個夢，失望到好想喊。


終於幾年後，搬咗去另一間屋，樓下有巴士行，極之旺嘅一條街，離家幾個舖位更加有巴士站，差唔多 符合晒當年場夢嘅情景。雖然而家屋企望落街，冇大巴行亦冇巴士站，廢氣噪音少咗好多，但至少一樣行人同汽車川流不息。但星期日，憑窗觀天，一片澄空，總會 吸引自己不如出去，影相好，行街又好，總之吸納多啲人氣。

今日去咗呢個久違嘅地方。

第一次入嚟呢區係十幾年前探老人家，不過每次都只係搭車路過，對上一次都係成年前，今日先至係第一次落地響呢頭行。一個典型住宅區，有公屋、私樓，巴士車站，商場，有乜特色？講真，的確冇。

新巿鎮嘅住宅區，同市中心熱鬧程度冇得比。冇錯，落車嗰陣，感覺幾舒服，至少唔駛逼來逼去，想行得快，行得慢，悉隨尊意。一架巴士、輕鐵埋站落客，條街多咗一堆人，忽然旺晒，不過大家都行色匆匆，嗰堆人一分鐘之內沿東西南北幾條路散開晒，轉眼又回歸平靜。人 氣只存在於嗰一瞬間。連綿不斷、川流不息嘅人潮，此處絕無僅有。街上遇到任何一個人，都係搭車去到最近自己屋企個站，落車就直奔家門，頂多去附近商舖買嘢飲食，由一個區行去另一個區嘅人，少之又少。冇辦法，大家出親門都要坐成個鐘頭車，交通佔用嘅時間特別多，又邊有心情逛街？

呢啲就係我嘅「屯門印象」。我雖然未做過一日屯門居民，每次踏足呢度，別有一番感覺。除咗市廣場、新墟一帶，其他各處，只要稍為遠離馬路，少咗車聲，我就會感到寂寞，寂寞，緣由就係欠缺人氣。

本來係想行多一陣，去多啲角落影吓相，花草樹木，新舊高樓，但係當響一條行人稀少嘅路上行嘅時候，「寂寞」又撲埋嚟，最後只有投降，見到巴士站，只有一個念頭：走。巴士站比較熱鬧，大家都抱着同一想法：搭車出九龍。

始終都係市區好。

p.s. 當區居民請勿見文即插，我只係寫自己今日喺屯門街頭嘅感覺，如果鍾意靜又唔想見太多人，呢個區應該好好住。

風花雪月

開blog咁耐，從冇專題評論時事新聞，將來都唔打算寫。

呢個唔係時事討論板，費事有人乘機入嚟發表佢嘅偉論，若果同自己立場唔同，盞沉唔住氣同佢嗌交，唔多好，遇着所謂「網特」，對啲異見人士洗板、hack板就無謂。

都係風花雪月，講自己同身邊嘅人和事，已經夠晒題材。

＊　　＊　　＊

又過咗一個禮拜嘅「非人生活」，每晚瞓得四、五個鐘。工作需要，朝朝六點幾要起身，出街又行又企一兩粒鐘閒閒地，冇法子，盡責就係咁，我大可坐響冷氣房聽其他同事滙報，不過點同自己親眼睇有得比？我呢挺辛苦命，奉旨打一世工，唔做得老闆架。

你或者會問，既然明知日日要一早出門，夜晚唔早啲瞓？呢個講易做難，我都算準時收工，五點幾恢復自由身，返到屋企，睇陣電視新聞，食晚飯，打掃清潔，八點零開始係自己時間，上吓網，來來去去睇平時嗰幾個，時間好快過，但通常唔駛一個鐘都睇完，但點解都夜瞓？原來大敵係google同wikipedia。佢哋足以令你網上流連忘返，尤其wikipedia，入一個關鍵字，睇一個人、組織、機構嘅歷史，內容有大量相關連結，吸引你會一層層入去睇其他項目，原意睇一篇文，最後會睇成十幾篇至收得工。好多時一個人就咁黐住個電腦兩三個鐘頭唔捨得走，然後去沖涼，好容易到十一、二點，又點會夠瞓？

今日唔駛返工，本應可以瞓耐啲，點知早輪習慣起早身，個生理時鐘踏正六點三個字就整醒自己，望一望個鐘再瞓，七點幾醒一次，八點幾又醒，九點半先起身，成個人天旋地轉，係響張床度好耐，但好似冇乜瞓過，簡單講，睡眠質素差。

陪人返學

我今朝個樣十足十似個學生。恤衫黑西褲皮鞋，背囊孭後面，只差在件衫冇校章。踢爆自己，唏，我日日返工都係咁啦。

開學頭幾日要例行巡視業務，朝朝六點半就起身，去學校區睇啲車生意好唔好，有冇人搭唔到車，路面交通暢通定塞車。度度啲學生一齊返學，每次只能睇一處，要睇勻管理範圍內每個學校區，起碼要連續睇一個禮拜。弊，開始眼瞓添......

今朝去九龍塘學校區睇交通。同成班中學生一齊逼巴士，又一齊落車、等過馬路，由街頭到街尾，數埋成幾千位學生哥，哈哈，自己又幾似佢哋喎，差在身邊冇同學傾計啫。聯想起我以前讀中學嗰陣，咦，唔會咁樣個噃，因為個巴士站喺正學校門口，一落車就入到校門，點似九龍塘咁壯觀，跟住一大串人潮齊齊前進？呢個blog成日齋字冇圖，今朝都唔記得搵手機影張相貼出嚟。

我班中學同學而家點樣？唔好意思，大部份都失咗聯絡，只有三幾位街坊同學，而家返工放工仲時時會響街頭碰見啫。嗰個年代嘅學生，都會對呢首歌有共鳴，我都一樣：

「永達共大傑唱詩 歌聲多醉甜
秀麗伴在樂敏肩 溫馨的臉
多麼多麼的高興
多麼多麼的溫暖 快樂人共並肩
今天應該很高興 今天應該很溫暖
祇要願幻想彼此仍在面前」

回憶永遠都甜美。但回憶歸回憶，既然選擇咗留低，咪羨慕人哋，做人都係向前望積極啲。

ps. 今日搭巴士，隔離打對面坐咗兩個中學生，兩個書包係同一牌子兼同一花紋顏色，差在唔同款，一個背囊一個斜孭，幾巧合？以為佢哋係同學，但坐到其中一個落車，都冇打到招呼，至知佢哋原來唔相識。俾着我係佢哋，身上有件衫有樣嘢勁似，就一定彈開，朋友都咁話（呢兩個仲係一男一女）。有一次朋友約出嚟食晚飯，出門前佢專登打電話嚟問我着乜衫去，呵呵，佢知我買咗一件同款唔同色嘅衫，佢今晚就着咗去，於是先旨聲明唔准我又着！

陰沉？禮拜日

今日係禮拜日，朝早好早瞓醒，食完早餐都一輪，依然冇乜嘢細藝好做。

本來禮拜日應該好唔得閒嘅，可以去影相，可以去打雀，曬太陽又得......偏偏今日冇太陽，家吓又沈咗一陣仔雨，不過我寫完呢篇嘢都會出吓街，博吓陣間天色可能好啲。

有朋友用心良苦係佢個blog寫咗一篇長文，好抱歉，因為篇英文太多生字（對我來講），睇咗頭一小段就冇興趣睇，頭先至俾些少心機再睇，至發現佢係講緊我自己。都好嘅，原來小弟個blog寫咗咁耐，時常寫埋啲又長又臭冇乜圖片嘅文章，原來有長期讀者架！

佢好耐以前已經抱怨部電腦個OS換咗就打唔到中文，從此只可用雞腸發言，我都好努力去鑽研佢嘅文筆，對唔住，好多嘢到而家都唔係太明白。文中經常拼錯字，濕碎料啦，我都認得出睇得通，最麻煩係一啲詞語嘅意義，我同佢嘅理解唔相同，佢嘅文章艱深難明地方就係呢度，以我嘅有限才智點推敲都推唔到。

不過，我對「Gloomy Sunday」一首歌完全冇感覺。
第一，未聽過呢首歌。
第二，睇完佢開文引述嘅歌詞，冇共鳴感。

照佢講，我嘅性格好有問題。我自認個性唔完美，佢所講某程度係正確嘅。但要跟足佢嘅提議做，都幾理想化，甚至可謂不切實際。文人寫嘢，點都要肉緊些少，誇張一Ｄ，先吸引到人去睇。

講做嘢，理想係至善，現實最醜惡。大機構同小機構分別就係，大機構分工精細，有Ｄ嘢唔到你控制，例如你只係做廚師整餐俾人食，一個餐用乜材料，整幾多份量，係老闆限定嘅，你根本冇權力去改用料或者改大個餐，就算老闆准你提意見，但最後都唔睬你，你日日去嘈佢咩？朋友做開細公司，以前有本事當面插個廢柴波士（據佢講又真係廢柴一條），唔知呢個世界艱難架嘞。

其他做人處事嘅建議，講得幾冠冕堂皇，不過只有空泛嘅大原則（嗰啲我都識），睇完都冇乜幫助。文章後半部份，對唔住，暫時唔想評論，因為好多文法同用字有歧義，強行去理解，錯誤機會好高，口同鼻拗就無謂。至少我唔明點解佢會話我「響度呃緊自己」（希望我理解錯）。

最尾講到我好似冇得救咁，「因為佢睇嚟要避開我......」，吓？我一直都喺度喎，起碼我未試過拒絕聽佢嘅電話。佢鍾意開文章寫人（至少寫我），但佢唔會響我面前講，點解？我冇收佢電話都有幾個禮拜。佢經常認為我嘅溝通方式好唔妥，但彼此響網上自說自話，唔通又係一個好嘅溝通方法？

九月新嘗試

有朋友嫌呢個blog全部寫語體文，太過文縐縐。咁又啱，睇勻大部份blog都用口語寫，不如趁今日九月一號新學年開始，試吓改寫廣東話，應該可以寫快Ｄ，應該會表達得輕鬆一Ｄ，亦希望大家睇快Ｄ。

不過我會堅持一係純白話，一係純口語，壹傳媒式兩溝文筆好似「乜嘢都係他們話事」一定唔會喺度出現。假如真係有嘅，請pm過嚟狂抦，我就每次錯誤，捐十蚊畀無國界醫生（或者其他慈善機構）。

＊　　＊　　＊

講樣寸些少嘅事（至少對朋友某係幾寸）：我最新一張信用卡月結單金額極速縮小，只係上一張嘅零頭。點解使少咗咁多？我估第一係呢輪好少同朋友食飯，就算有，都爭唔到埋單，因為有朋友更快手，佢話呢排冇乜現銀，堅持要佢找數，等我哋夾番cash俾佢周轉。其實我嘅情況一樣，不過算啦，同佢爭，驚佢會dup我。

第二個原因，都幾啱大家試吓用嚟慳錢。我有一樣嘢想買，但係成個月都未買到，因為冇貨（可能仲未出，或者唔再有），因為呢個緣故，搞到冇心情去行街睇嘢，即使有Ｄ嘢應該要買（例如換季）都冇乜動力去睇去揀。呢個情況，就如一架電車埋站之後壞咗行唔郁，後面嘅電車爬唔到頭，全部要排隊等。「買唔到嘢」固然令自己唔多高興，但佢嘅副作用居然幫自己慳到錢。哈，第日照辦煮碗，恨一件有錢都買唔到嘅嘢，就可以令自己買少好多嘢！但若過幾日我見到恨咗好耐嗰樣嘢有得賣，我飛撲去入貨，跟住買其他嘢嘅欲念就好似火山爆發，正如上面個比喻裡架壞電車開番郁，頂喺後面嘅電車一齊開動，個荷包就有難！

＊　　＊　　＊

今朝單位領導人忽然嗌大家坐埋開會，平時佢主持呢Ｄ緊急會議，頂多三幾個字就收工，但呢次史無前例咁講咗一個半鐘！原來大老細請咗顧問返嚟要大家brainstorming，主題係「如何改善公司業績」，請所有同事放低身段自由發表，天馬行空都可以提，仲要唔駛介懷自己乜嘢部門乜嘢級數，踩去人哋嗰瓣都唔怕（當然要冒俾人鋤嘅風險）。

班高層識得咁諗，太正喇！我哋呢排好難做，Ｄ控制資源嘅部門食古不化，保守官僚出晒名，我哋諗到條好橋可以做多Ｄ生意，就算賺唔到錢，起碼蝕少Ｄ，又唔會攞多咗資源，佢哋就打電話嚟長篇大論dissuade我哋唔好諗，列舉一大堆似是而非嘅論據，驚個方案會得失唔同嘅客，未見其利先見其害，到時盞公司做咗箭靶，兩邊唔討好......總之乜鬼都唔好試！家下大老細鼓勵大家乜嘢都可以提，可唔可以解放到嗰班古老石山嘅思想？