某日，佢準備由元州邨去愉景新城。你估佢搭乜嘢車？
對正常人嚟講，首選：地鐵啦！八達通由長沙灣去荃灣，只係$6.80。
又可以搭紅色小巴，快靚正。
但Gary總算係巴士迷一個，佢梗係首選搭巴士啦。
一般人當然會搭30X/234X，$7.50直到門口。（30X好彩嘅會整部平平哋嘅$5.30熱狗你歎）
最平嘅有33A，熱$3.50／冷$4.60，但衰兜路又唔到。40勉強都OK，不過同30X差唔多價錢，兼且行得遠。
Gary以上乜車都唔揀，偏要等最貴嗰條66，仲話一定要搭到架低地台冷氣巴！
唔係嗎？66冷氣車收十個零二！架車去屯門架，你淨係搭半程去荃灣，Gary兄，好有米乎？66係條出晒名嘅霉線，班次幾乎係長沙灣道幾十線巴士裡面最疏嘅，仲要揀冷氣車？等到天光都未到啦。又貴，等得又耐，行程又唔直接，貪佢有乜好？
Gary話：荃灣X線行荃灣路，日日行嗰處，一早厭晒，66就唔同呢，行葵涌道、青山公路，呢條係舊路，一路行可以一路回味十幾廿年前入荃灣嘅感覺，風味好唔同架。你睇吓網上班巴士迷呢，佢哋成日都鍾意搭66，講到班車長個個都賽車手咁勁，條線又唔係太迫人，搭66一定好爽！仲有呀，66個number show係車頭好型仔，我鍾意（吓！上咗車就睇唔到噃），就算收$10.20都值回票價！你可以講虛榮啫，我只係追求一種感覺，貴少少有乜所謂？趁而家仲後生，至有呢種閒情逸緻，第日成家立室，邊得閒咁做吖。搭66熱狗？EH......都可以嘅，但係低地台最正噃，有冷氣歎，架車新Ｄ，搭得開心Ｄ！橫掂唔趕時間，點解唔揀架最好嘅？
聽完Gary套偉論，嚇到我幾乎坐響櫈都撻落地。66冷氣車已經少啦，低地台仲要撞彩先有，但好衰唔衰，Gary自從響網上見到呢幅相，就決心要搭66行低地台巴士，救命！
於是Gary好神心咁企響長沙灣球場門口個站等66。一路等，一路望住對面街嗰Ｄ反方向嘅66，睇吓有冇至愛嘅低地台巴士，仲要好認真咁數吓每班車上面有幾多客，當佢見到車裡面有啲年青嘅巴士迷就特別雀躍，佢會覺得嗰班係志同道合者，證明自己冇揀錯車！（事實Gary冇揀錯，66通常都有唔少巴士迷搭）
雖則66班次疏，但企咗好耐，熱狗都嚟過幾架，Gary依舊堅持，冇金色嘅低地台冷氣巴唔上！
唔經唔覺就等咗一個鐘頭。終於66有冷氣車到－－不過係白色車身嘅非低地台車，Gary都猶豫咗一輪：搭唔搭好呢？冇金巴，白巴都殺啦。但係，Gary轉頭又話：企咗咁耐，唔爭在堅持多一陣啦！於是部白色66埋站時，Gary始終冇遞手截車，目送佢沿慢線直行直過。
唔知係咪屯門公路有事塞車，過咗架白冷氣巴後，隔好耐都再冇66出現。Gary開始心急，打27454466去九巴熱線，問欽州街總站有冇66開，佢梗係問有冇冷氣車啦，對方答，而家總站未有車返，所以唔知幾時有車。佢又接住問66今日有冇出低地台車，對方答，呢樣好難講，每一日嘅用車都唔同，下架話唔定會係，不過而家仲未知。Gary收到呢啲模稜兩可，講咗等於冇講嘅答案後，就平靜咁收線，又去默默等待，追尋佢嘅66金巴之夢。
響巴士站企到就快變成一舊化石嘅Gary，由精神飽滿逐漸變得神情呆滯，連食環署阿姐都嚟倒第二次垃圾，仲認到佢，問佢「乜你仲等緊呀？邊架車咁失魂呀？」過咗一陣，66終於有車到啦，不過係熱狗，Gary望一望架車，依舊紋風不動。
第二班66又過埋，一樣係熱狗，Gary意志睇嚟開始動搖，佢諗，冇金巴，白巴係第二選擇，照殺都冇所謂啦，橫掂都係冷氣車啫，頭先熱線員講，低地台唔係日日有，可能真係冇得出噃；而且假如交通唔多好，分分鐘連冷氣巴都冇得嚟架！
望望手表，原來佢企響巴士站已經足足一百二十分鐘！佢都癲嘅，邊個正常人會為一程唔駛半粒鐘嘅巴士等兩個鐘？又唔係冇車嚟，不過係咁揀，揀極都唔啱，我真係佩服到佢五體投地。
遠處又有架66嚟緊，係白色冷氣車，究竟Gary會唔會上車呢？一場思想鬥爭又開始啦，如果佢上車，之前嗰一個鐘就係白等，萬一再下一架66真係金巴，就後悔莫及；唔上車，可能今日真係唔會有金巴，等到半夜收車都冇得嚟架。Gary原本有一個等車時間上限－－150分鐘，企夠兩個半鐘頭，就連66都唔等，30X, 234X都照上，不過當佢見到對面有66經過，又再燃起一絲希望之後，「等車上限」嘅念頭就消失。
「上唔上66白冷車」呢個決定，留番俾Gary做。
沒有留言:
發佈留言