又聽少一個

從此，呢位哥哥嘅新唱片將唔再列入我嘅買唱片名單之中。

唔係妒忌佢，盧淑儀又唔係我夢中情人。人哋結婚應該要恭喜嘅。

只不過，一個歌星結咗婚之後，歌路肯定要變，變成無事無幹都要晒幸福，變成適合擁有溫馨幸福家庭嘅夫婦，或者正在蜜運成功嘅情侶聽。

咁樣好自然，結咗婚仲去唱失戀、空虛，邊會有共鳴呢？一係就造作，一係就俾人傳婚姻有問題，豈不是自作孽？

當年一出「你的名字‧我的姓氏」之後，我已經再冇買學友嘅新碟。

Eason係唯一例外，只因為風格少有地變化唔大，但係總覺得欠缺咗啲嘢。

聽少個，冇所謂。橫掂克勤呢兩年都開始玩classic，挑戰高難度，呢啲一早已經唔係我嗰杯茶。

啱呀，我唔識欣賞。我亦冇打算去培養自己去欣賞。思想品味，十年不變，亦冇逼切需要去變。

如果對我嘅品味原地踏步（即係唔與時並進！）睇唔順眼，請祝福（甚至主動去介紹）我遇上一個人，用佢嘅影響力令我180度轉軚，將我嘅人生納回「正軌」，開始去欣賞克勤、學友嘅歌。