鍾意=/=值得買？

早輪，好少會一個人無聊去街shopping ，無意發現一樣「好嘢」，即場有想買嘅衝動。

係一對波鞋，顏色組合幾好，售價HKDXXX。

我買每樣嘢都有一個預算，唔過上限通常可以過關。對鞋唔過一千，符合我嘅預算。雖然認真來講，價錢相對鞋嘅用料比較高，只係個款搶眼些少，但心頭好係好主觀嘅，唔鍾意就話唔抵買啫，鍾意嘅，就唔係咁講囉。

不過我呢個人衰保守，係極度保守。霎時嘅衝動，幾時都會俾強橫、龐大嘅保守力量－－理性－－鎮壓住。對鞋啱咩？好似貴咗啲咁喎。不如返屋企，上網睇多啲資料先決定啦。

我只知對鞋屬於某一系列，上網一查，唔妥，竟然搵唔番exactly同款同色嘅鞋嘅資料。後來至醒起佢個全名好長，尾後仲有一堆Codes，要遲Ｄ再睇一次。隔咗兩日，再行街，今次真係專登搵呢對鞋啦，點知間舖頭show對鞋出嚟，只有價錢label，反轉再反轉都冇佢全名。

再望隔離左右，同系嘅款式一般平好多，原來我睇中咗一對「特別版」，難怪咁貴啦。

「特別版」？心即刻涼咗半截。然後，開始一輪角力：

「特別版mark高咗個價，明俾人掠水喎！」
「鍾意咪得囉，係貴咗，但未去到天價噃！況且佢明碼實價隨時有貨，唔係要通宵瞓街排隊買嗰隻，更加唔係ebay俾人炒到飛起嗰啲款。」

今日問同事甲，佢話：
「問你兩條問題：第一：你買唔買得起？第二：你係咪好鍾意？兩個答案都『係』嘅，去馬啦！」

一票贊成。但係一票唔多穩陣，再尋求支持，問同事乙，佢講：
「同事甲咁問係啱嘅，不過，呢件係特別版，就要小心嘞。呢啲潮流嘢，興得快時退得更快，你而家鍾意啫，萬一對鞋out咗，成條街冇人着，最弊佢咁sharp，人哋好覺眼，個個留意到你着緊件out嘅嘢，我怕你會頂唔順佢哋嘅目光。」
「呢對鞋響某店做緊八折推廣價？我估呢啲係散貨嘅跡象，特別版有得打折頭賣，真係要小心佢隨時冧價，即係話佢唔再潮啦。不如搵其他正常價錢嘅款式，穩陣好多啦！」

話到如此，保守嘅我又點會冒呢個險？

諗落又係，上網除咗睇唔番嗰對鞋嘅資料之外，同系列嘅鞋都唔係網民熱話，至少唔係今日嘅top model。

潮流幾時都只可以跟紅頂白，冇得堅持。正如十幾年前，興蘿蔔牛仔褲，蝴蝶袖衫，啱晒我口味，但後來轉咗流行喇叭褲、到而家窄身褲，我點敢攞番當年至愛嘅蘿蔔褲出嚟着，博俾人當怪物咁睇咩？至怕警察先生見到我啲衣着out到不得了，當我係偷渡客要當街查證搜身，就瘀到貼地。

不可買錯

十二月，使錢月？

一般人鍾意聖誕新年前多使錢買嘢，都係嘅，一來轉季，二來年尾舖頭開始sale，購物區都零舍逼人。人人都行街，氣氛自然感染開去。

唔駛屋企人教，我一早曉得唔應該浪費。我幾時都討厭食剩晒啲嘢，所以出街食飯，俾我點菜肯定會刻薄，唔係孤寒，只怕食唔晒。不過千祈咪旨意我做清道夫，食剩成枱嘢叫我埋尾－－我最驚飽過龍，嗰種感覺非常難頂。望住未郁過嘅食物送入餿水桶，我會覺得好可惜，但愛莫能助。

由食嘢唔應該浪費，引申到買嘢使錢亦唔應浪費。我只奉行一個宗旨：寧可買貴，切勿買錯。

買衫買鞋，買咗返屋企先至發覺唔靚唔啱，惟有塞落衣櫃一角，等年尾執衣櫃時掟出嚟，吓？全新未着過架？我會覺得肉痛。

所以，行街shopping唔係我嘅興趣。我好少百無聊賴就去shopping，相反，真係想買一樣嘢，例如對鞋開始爛，打開衣櫃冇乜衫啱襯，有咗目標，先至去搵。

好處係，慳番好多無聊shopping時間，更重要係唔會無情白事，買咗啲無謂嘢。好多人買嘢都係霎時衝動。

唔好處係，少咗shopping機會，容易錯失一啲正貨或者減價時機。成日行街嘅朋友會醒目，知道各大名店幾時出新貨，幾時會減價，俾我，就蒙過蒙正，一間舖頭或者一個品牌，隨時成季都唔睇一次，錯失良機都唔知，可能剛剛減完價，可能買完隔兩日就開始sale。

有人教落，行街shopping見到有嘢鍾意，千祈唔好即刻買，要俾自己一段冷靜期，至少，要離開現場，出去兜一個圈，如果件嘢依然縈繞腦間，先至證明真係鍾意，咁先好返轉頭買。

呢個原則，我奉為金科玉律。

有啲人更激，平日出街只帶少量現金，連信用卡都唔帶，保證自己唔會衝動買錯嘢，睇啱咗，唔淨止出去行個圈，直頭要返屋企攞張卡先可以返轉頭買，冷靜期夠長啦啩？

誰會珍惜當你還擁有

你或者會問，呢篇文章點解咁遲至出，天星碼頭都變咗一件過氣嘅回憶囉。

呢個係香港人本色。

香港人，唔到最後一刻鐘，都唔會珍惜身邊就快失去嘅嘢。

呢啲都係要多謝各家文字同電子傳媒鋪天蓋地宣傳天星碼頭就快要搬，愈臨近搬遷一日，愈要排山倒海大篇幅報道，慌死你哋唔知道。最後一日有成十五萬人「送別」？嗰日又真係多咗好多人搭天星小輪嘅，但係當中居然有人以為係「天星小輪最後一日服務」！！

大家都知道中環有第三期填海。

大家都知道要填海，個碼頭就一定要搬，舊碼頭一定要拆。

嘈咗幾年，填海工程始終要上馬，由開工嗰日起，舊天星碼頭就開始倒數，但係從來冇人提。

係要臨尾兩個月，人人撲出嚟呼天搶地嗌「拯救天星」，有乜嘢用？

點解唔一開頭就反對填海？反對起新路？或者將工程改一改，避一避？去留住呢個「集體回憶」？

冇辦法。香港人唔係貪新忘舊，香港人唔係一窩蜂，點算係香港人？

今日路過舊天星碼頭，仲有幾多人會望多佢嘅「遺容」一眼？

有心人，趁呢幾日，快啲望多兩眼啦。棚都準備搭，好快落帆布，打埋包，就開始拆架啦。



難怪網上會有人鬧前日朝早嗰班潛入鐘樓敲鐘嘅示威者係搞屎棍，博宣傳，又話佢哋想整爛個鐘。佢哋只不過係城市發展之中，一小撮人過場做嘅另類表態，時代巨輪之下，一堆微不足道，冇力抵擋嘅過路螞蟻。

班刁民成日鬧政府摧毀香港人嘅「集體回憶」。肥何局長前一輪響報紙鬧我哋「濫用『集體回憶』」，諗落又冇鬧錯吖，個天星鐘響足四、五十年，幾時有個傻佬走出嚟話「啲鐘聲已經係香港人生活嘅一部份，千祈唔好俾佢停，一定要響多五十年、一百年」？「集體回憶」係乜？係人講你又講囉，係呢兩個月突然「人氣急升」嘅「潮物」囉。香港人，幾時先至醒覺，唔再俾啲面向神州，面向大財團大商家嘅高官睇死，你哋除咗得個嘈字，仲有乜嘢做到？

拆咗天星碼頭，重有喜帖街、中環街市、灣仔街市、太原街街邊檔......樣樣都算得上「集體回憶」，全部都要留低？睇吓有冇人炒慶佢做城市熱話啫，就算有，結局咪又係一樣！

新碼頭俾人話係「假古董」，鐘樓發出嘅係電子鐘聲，冇厘感情。哈，新嘢幾時都睇唔慣架啦，過幾個禮拜，習慣咗就順眼好多，順耳好多。

遲多一兩個月，當舊天星碼頭拆平，變成一片黃泥地嗰陣，再提「以前呢度有個鐘樓」，會唔會俾人話out呢？

p.s. 之前嗰個等66號巴士古仔，有下文嘅。Gary響等足135分鐘之後，離開咗個巴士站。
佢放棄咗66號低地台巴士？唔係喎。
佢上咗架66白色冷氣巴？唔係喎。
佢唔搭66，上咗其他車？都唔係喎。
佢最後決定唔去愉景新城。
Gary諗通咗，人生幾十年，可以話係流流長，可以只係一剎那：渾渾噩噩咁過，時間可以好慢；做好多有意義嘅事，時間只會唔夠用。
呢個故事教訓Gary，愉景新城唔係Gary屋企，只係一個娛樂消遣嘅地方，去愉景新城，唔搭66，可以搭30x, 234x，地鐵，小巴；就算去行街shopping，唔一定要去愉景新城，可以去新都會啦、朗豪坊啦、又一城啦、海港城啦，......再唔係，去apm都得嘅。
Gary經此一役，對66號線嘅低地台巴士會唔會因愛成恨？一切隨緣，Gary對66低地台巴，以至66號線嘅態度係indifferent。今日唔去愉景新城，唔代表以後都唔去。第日又見到66行金色冷氣巴，佢都會坐番轉－－只要佢未脫離巴士迷呢個身份。