馳車天地

唔好誤會今日我去咗迪士尼。

作為香港人，我寧願去土炮海洋公園，都唔恨去嗰家的骰到極嘅洋貨遊樂場。

今日只係一個平凡無奇嘅踩單車活動。

雖則平凡，都冇玩兩年幾。

老友更精彩，佢話十年（！）冇踩過單車，先旨聲明，要全程睇實細佬咁話。點敢唔等你啦，大佬！^_^

當年唔係愛上咗單車，可能我嘅體高會少幾吋。

曾經係班裡面第二最矮、最輕嘅同學（只計男性），最近至聽聞老媽子嗰陣擔心到極，驚我大個咗會成為一個細細粒粒嘅藥煲。我嘅發育期真係遲過人，中一、中二身型先開始大變，兩年間標高八吋，體重增加四十磅。呢個就係我玩單車嘅高峰期。

或者，我鍾意操縱機器，更鍾意用機器帶自己四圍去。

理論上，我應該熱愛駕駛，十八歲即刻去考牌，養番架車仔。

結果係，當日運輸署考筆試，我係全場最老餅嗰個。

個車牌攞咗三年，雪足三年，三年之後又三年，我估都一樣。

冇錢養車揸車，踩吓單車囉。對身體更健康呢。

而家嘅單車，一樣可以入波，上斜平路，隨意選擇，當然要用自己嘅體力。

近排太多節目，屋企又多嘢整，唔係好夠瞓，尋晚重唔係好舒服，覺得呼吸有啲唔順，以為今日要缺席單車之旅。

無端端透唔到氣，我試過好多次，但有人話唔駛擔心，可能不過係輕微驚恐症。

太耐冇約人戶外活動，可能會有影響。第一，驚體力透支，中途唔妥會好麻煩，更怕衰俾朋友睇（吓，乜你咁潺㗎！）；第二，萬一真係驚過籠，朝早唔舒服到起唔到身，失約就更加唔好。

好在今日天氣唔錯，心情大好，一切順利進行。

濕熱

每年一度嘅全民運動，今朝舉行咗。

四萬三千幾人報名。即係多過全港人口百份之0.6。換言之，大約160人當中會有一個報名。

相信絕大部份嘅香港人都會識得最少一個參加馬拉松嘅朋友。

唔係舊年有人跑到一命嗚呼，都冇人留意空氣污染、忽然運動......呢一連串問題。有人要求首次報名者唔准跑全程，只可以由10公里、20公里慢慢上。我有位朋友跑完返嚟，未問佢有乜嘢感受。

今日又濕又熱，係馬拉松高危天氣。又有三十幾人跑到要入院，六個留醫，當中一個危殆......歷史重演。

人哋跑馬拉松，自己要工作。涉及交通問題，封路改道，我要整大量通告俾乘客知。到改道時間，要親身視察交通情況。每年嘅例行公事，辦公之餘，順便帶埋相機做一個紀錄。

有時，都想將跑馬拉松當成自己人生大計之一。只要一次就夠，不論長或短。

幾時成事，睇自己啦。不過要緊記，想去就要平日時時操練，尤其是比賽前一兩個月，每星期要累積跑到超過比賽所需嘅里程至合格。

呢樣嘢，對我最困難。最麻煩係每日起居生活要重新編排，騰空更多時間做運動，唔係想像中咁易。邊個叫自己乜嘢都有癮，特別係互聯網裡面嘅誘惑太多，每日都吸引你去蒲三幾個鐘，再唔係就一個電話又講一兩粒鐘。

自己一個人報名玩？一定唔會。肯定要搵朋友一齊去。邊一年成事？依家唔識答大家。

希望有一日可以用雙腳穿過西隧，而唔係搭車過。不過，千祈唔好學嗰啲抱着「百萬行」心態嘅市民，帶埋相機去「跑」10公里，實情係企喺隧道裡面影家庭樂大合照。

＊　　＊　　＊

「企喺隧道裡面影相」......我諗我唔會做。企喺出邊又如何？

今日發生一件唔太順利嘅事。由呢件事，我可以認真到上網查香港法例，驗證誰是誰非；又去睇其他討論版，有無人有類似遭遇；又去搵朋友、同事幫手，睇吓有無渠道反映，希望得一個結果。

報紙或網站嘅論政文章，時常出現啲艱澀、學術味重詞彙，好似「公共空間」、「論述」、「話語權」、......，睇落好似明，但我唔識用。我或者會將上面嘅問題用嗰一堆詞語包裝歸類，寫投訴信俾政府部門？傳媒機構？還是當成一篇討論文章，響報紙「論壇」版發表？假如有膽去鸚鵡學舌，班門弄斧，我或者會寫篇「論私產化與公共空間萎縮」。

秋春夏

如常一個長週，要返半日工。

十二年來，返長週嘅下晝，八成機會去上面呢個地方，睇我鍾意嘅書刊報紙，見到有我認為好嘅圖文，就影印做參考資料。

不過，返去同人影畢業相，只有兩年前呢一次。

希望戴四方帽嗰位主人翁唔好介意：嗰陣我同你唔係太熟，唔多話題講。今時唔同往日囉。 ^_^

相中唔計自己有六個人，當時只識得其中兩個，家陣識齊晒（當然重有其他冇出席嘅朋友）。

本來好想將幅相打格仔，但好似唔多尊重人哋，既要打格，又要貼上網，根本係自相矛盾。其實打格仔嘅原意係要遮住自己個醜樣－－嗰日用錯set頭工具，加上一啲意外，整咗個我最討厭嘅髮型出嚟，臨場冇架撐，欲救無從。

＊　　＊　　＊

今日，陽光普照。好熱。

入到睇落冇乜變，實情漸漸喺度變（係愈變愈醜，因為不斷起高樓）嘅校園，通處都係怒放嘅杜鵑花，抬頭一望山邊，火紅嘅木棉花都開晒。

木棉花開，炎夏快來。唔係嘛？聽日先至係新十五，今日重算過緊年噃，夏天咁快到？

我個人偏愛夏天多過冬天，但咁快趣熱番，肯定唔係好事。

只不過印證，地球發緊燒。科學家警告我哋，過多幾十年，我要游水返自己屋企，因為海水愈來愈漲，我住個區遲早會變成海。

前兩年買咗件輕身又夠暖嘅行山品牌外套（唔係羽絨嘅普通貨色，不過都賣過千銀，幾乎貴過件西裝褸），每年都會有三幾日凍到低過十度，要着佢先出得街。呢個冬季冇掂過佢。着呢件大衣次數，係冬季似唔似樣嘅指標。今年呢個一啲唔似係冬天。今年經濟旺，行行賺大錢，惟有服裝店斯人獨憔悴，因為寒衣完全冇銷路。

恐怕香港就快變成著名六合彩主持人嘅真名一樣，「唔要冬」。

今朝着一件長袖恤衫，外加一件羊毛衫，返到公司後，羊毛衫除咗落嚟，一直到返屋企都冇再着到，上身只有一件薄衫頂得晒，行得多重要出汗呢。（得一件衫？冇錯，我今日「真空」上陣）

頭先睇天文台網頁，下晝氣溫有廿五、六度，難怪。而家埋位打文，就係同夏天一模一樣，不折不扣嘅短褲背心look，差在冇開冷氣啫。



估你唔到，敝家今年已經有開冷氣嘅紀錄。年初二下晝依傳統，全家一齊食開年飯，嗰日冇今日咁熱，但我侄仔一坐落飯檯就嗌熱，手快快開咗大廳個冷氣掣，於是就享受咗2007年第一次屋企歎冷氣。

我哋屋裡邊涼，熱氣噴晒出街，地球於是更加熱，幾罪過吓。

憑侄仔嘅敏捷反應，我相信我大佬屋企今年應該開過無數次冷氣。

侄仔拜完年走後，我即刻將冷氣機身嘅大掣擰去"off"，撳牆上冷氣掣都唔會着。應該遲Ｄ再用封箱大膠紙黐實冷氣機panel蓋，四五月之前唔准撕。

好熱，着衫少咗，照鏡多咗，因為要留意吓自己體型，提防拜拜肉，鬼祟肉現形。最難睇係自己條腰，鬼叫日日返工、屋企都坐響部電腦前面做人咩。由細到大，老媽子成日嫌我瘦，擔心身子弱（小學五年班全班度高磅重，我榮獲體重亞軍－－由最輕排起），呢一兩年掉番轉要小心過重。我計過自己BMI升到24，剛剛高出「標準」範圍。

健身中心開始踏入旺季，時時爆棚，我反而要多啲去同人逼。

幾年前某次遊船河，貪得意響沙灘叫朋友幫自己影低一幅「玉照」，嗰陣嘅身型係我歷來最好嘅。認真來講唔係太好，的確係冇肥膏，但略嫌單薄，多啲肌肉就perfect啦。幅相重做埋大相，而家都唔知攝埋邊個角落。

換季囉。我嘅買衫目標，睇嚟只有短袖衫、短褲甚至冇袖衫；鞋都應該要買（老人家話起碼要等到3月19號至好入貨喎），鞋款呢，或者要俾腳趾透透氣。

p.s. youtube問題已解決，多謝網主！ ;->