馳車天地 II

BLOG一樣可以學電影咁有續集？

冇搞錯。

今日又去玩單車。

路線起點同終點一樣，都係嗰間可以A店租車B店還嘅單車舖。途中所行嘅路線，九成翻炒上一次。

上次嘅同行者今次又再嚟，但係再多啲人。到嘅全部都係想見嘅朋友，不過有啲預咗嚟嘅，最終冇到。

咁多嘢重覆，都有癮？

無他。即係證明我鍾意呢種活動。

但根據"principle of diminishing return"，今次無論如何都未及上次咁過癮。

今日遲咗成個鐘出發，但係早咗到終點。

唔止為咗乜，今日成班友博命趕，上次中途加插入中大開餐嘅節目，今日食定嘢起程。或者上次悠閒到影晒沿途風景，今次純粹大家鍊車。

悠閒有悠閒好。飛車有飛車好。玩法唔同。

上到吐露港海濱，又幾難唔去飛車。今日實在太多單車，行慢些少都俾後面嘅人撞。

幾乎係俾其他人迫你不停前進，想搵個位停埋一邊休息，都唔容易。

我唔係最快嗰位，但靭力算夠，至少上斜路未試過要落車推。

上次熱又曬，今日天陰陰，但係單車友多好多。去番同一間單車舖，上次要60蚊一架車，今次一開口要90！我哋帶多兩個人嚟噃，猶豫咗一陣，自動減價去80，成交！

都係上次天氣好啲，人又唔算多。或者係長假期效應，又或者上次朝早預報落雨，嚇走唔少人。

相？唔貼啦。沿途又係嗰啲風景。